जर्मन कपया उपाधि बायर्नयात

येँ । बुण्डेसलिगा च्याम्पियन जुईधुंकुगु बायर्न म्युनिखं जर्मन कपया उपाधि नं त्याकुगु दु । म्हिग चान्हें बर्लिनय् जुगु फाइनलय् बायर लेभरकुजनयात २ विरुद्ध ४ गोलं पराजित यासें बायर्नं उपाधि त्याकुगु खः ।
कासाःय् निगु गोल याम्ह बायर्नया फरवार्ड रोवर्ट लेवान्डोस्कीं थुगु सिजन ५० गोल समेत पूरा यागु दु । ओलम्पिक स्टेडियमय् जुगु कासाःया १६औं मिनेट डेविड अलावां गोल यासें बायर्नयात अग्रता ब्युगु खः । २६औं मिनेटय् सर्जी जीनाब्रीं गोल यासें बायर्नया अग्रता दोब्बर यात । न्हापांगु हाफय् बायर्नं उगु अग्रतायात कायम यात ।
५९औं मिनेटय् लेवान्डोस्कीं बायर्नया लागिं स्वंगु गोल यात । ६३औं मिनेटय् लेभरकुजनया स्भेन बेन्डरं गोल यासें गोल अन्तर कम यायेगु कुतः यात । तर ८९औं मिनेटय् लेवान्डोस्कीं व्यक्तिगत निगु गोल यासें बायर्नं ४(१ या अग्रता कालः । ९०औं मिनेटय् लेभरकुजनया काई हाभार्टं पेनाल्टीं गोल यात ।
थुगु कासाः त्याकेधुंका बायर्नं अपराजित यात्रायात २६ कासाःतक्क थ्यंकुगु दु । अथेहे दक्वः प्रतियोगिताय् याना बायर्नया थ्वः मद्धिक्क १७औं जित खः । बायर्नं २०औं पटक जर्मन कप त्याकुगु खः ।
निगु गोल याम्ह लेवान्डोस्कीं थ्वः सिजन ४४ कासाःय् ५१ गोल यायेधुंकुगु दु ।