म्याग्दी व कास्कीं चलः वना प्यम्ह सीत, न्हेम्ह बेपत्ता

maitrinews

म्याग्दी । मद्धिक्क वाः वगु हुनिं वगु चलखं म्याग्दीया धौलागिरि गाउँपालिका–६ मराङया रिखाय् शुक्रबाः सुथय् न्हेम्ह बेपत्ता जुगु दु । घण्टीवाङ धैगु थासं चलखं निगु परिवारया न्हेम्ह बेपत्ता जुगु मराङया वडाध्यक्ष राजाराम सुवेदीं जानकारी बियादिल ।
वय्कया कथं भीमप्रसाद जुग्जाली व धनबहादुर जुग्जालीं छेँ नं चुइका यंकुगु दु । भीमप्रसादया छेँ प्यम्ह व धनबहादुरया छेँ स्वम्ह दुगु खः ।
अथेहे, च्वय्या भागय् च्वंगु घण्टीवाङया १३ परिवार चलखं विस्थापित जुगु वय्कलं धयादिल ।
अथेहे, मराङयाहे कल्लेनीया धारखोलाय् वगु खुसीबा नं निखाः छेँ चुइकुगु दु । वीरबहादुर पुन व परदेवी पुनया छेँ चुइकुगु स्थानीय भुवानी पौडेलं जानकारी बियादिल । छेँच्वपिं मनूतयेसं बिस्युवना ज्यान बचेयागु दु ।
थुखे, कास्कीया सराङकोट व हेम्जाय् चलः वना प्यम्ह सीगु दुसाः न्हेम्ह घाःपा जुगु दु ।
पोखरा १८ सराङकोटया गोठादीं छेँ च्वय्या लँ कुतुंवया वगु चलखं टंकबहादुर थापाया छेँ चुइकुगु व छेँच्वपिं झीम्ह लागु खः ।
झीम्हमध्ये स्वम्ह सीगु दुसाः न्हेम्ह घाःपा जुगु दु । इमित स्थानीय व प्रहरीया संक्रियताय् अस्पताल यंकुगु दु । इमित मणिपाल अस्पताल यंकुगु कास्कीया प्रहरी प्रवक्ता सुवास हमालं जानकारी बियादिल ।
चान्हें जन्मदिन हनेत मेपिं इस्टमित्र समेत वगु हुनिं गोम्ह दु धैगु सिमदुगु हमालं धयादिल ।