देँन्यंकया होटल सञ्चालनय्

येँ । प्यलाः ताहाकगु बन्दाबन्दीलिपा बिहीबाःनिसें देँन्यंकया होटल सञ्चालनय् वगु दु । कोभिड–१९ सङ्क्रमणया हनिं जुगु बन्दाबन्दीपाखें अप्वः प्रभावित जुगु होटल सुरक्षा मापदण्ड छ्यला सञ्चालन जुईत्यंगु खः ।
सरकारं साउन १५ गतेनिसें होटल तथा रेस्टुरेन्ट सञ्चालनया अनुमति बिईधुंका नेपाःया होटल चागु दु धैगु सन्देश बिइगु तातुना होटल सञ्चालन जुई त्यंगु होटल एसोसिएसन अफ नेपाल ९हान०या न्हापांम्ह न्वकु विनायक शाहं जानकारी बियादिल । होटल सञ्चालनय् हसाः नं थुगु अवस्थाय् अप्वः ल्याखय् पर्यटक वइगु खनेमदु, वय्कलं धयादिल, यद्यपि सरकारं अनुमति ब्युगु अवस्थाय् नेपाःया होटल बन्द मजु धैगु सन्देश राष्ट्रिय अन्तर्राष्ट्रिय रूपय् बिइत न सञ्चालन यायेत्यंगु खः ।
बिहीबाःनिसें होटल तथा रेस्टुरेन्ट सञ्चालन जुसाः न तारे होटलं धासाः १० प्रतिशत जक सेवा सञ्चालन याइगु जुगु दु । होटल सञ्चालनय् अप्वः खर्च मालिगु तर उगु कथं ग्राहकया सम्भावना मदुगुलिं दक्वः सेवा बिया सञ्चालनय् हयेत समस्या जुइगु व्यवसायीया धापु दु ।
यद्यपि चिँधंगु व मध्यमस्तरया होटलं धासाः सेवा बिईफुगु अवस्था दुगु शाहया धापु दु । वय्कया कथं थ्वः अवस्थाय् स्वास्थ्य प्राथमिकताय् दुगुलिं दक्वः स्वास्थ्य मापदण्ड पालना याना जक सेवा सञ्चालन यायेत थः दुजः होटलतयेत हानं सुचँ ब्युगु दु । थुकिं न्हापा नेपाल पर्यटन बोर्डं होटल तथा रेस्टुरेन्ट सञ्चालनया लागिं स्वास्थ्य ‘प्रोटोकल’ सार्वजनिक नं यायेधुंकुगु दु । साउन १५ गतेनिसें होटल सञ्चालनया अनुमति ब्युसाः नं थुकिं न्हापा नं गुलिं होटल सञ्चालनय् वयेधुंकुगु दु। खासगरी विदेशपाखें उद्धार याना हपिं नेपालीयात क्वारेन्टाइन स्थलया रूपय् सरकारं तोकेयागु होटल सञ्चालनय् वगु खः ।