थौं गुंपुन्हि देँन्यंक हनिगु, नेवाः समुदायं क्वाँटी नयेगु चलन

येँ । श्रावण शुक्ल पुन्हिया अवसरय् थौं गुंपुन्हि तथा ऋषितर्पणी पर्व हनिगु खः ।
प्रत्येक वर्षया श्रावण शुक्ल पुन्हिया अवसरय् गुंपुन्हि हनेगु प्रचलन दुगु खः । थुगु दिन आत्माया शुद्धीकरण व शरीरया रक्षाया लागिं ब्राह्मण पुरोहितया ल्हातं नाडीइ रक्षाबन्धन चिइगु प्रचलन समेत दु । तागाधारीं कश्यप, अत्रि, भारद्वाज, गौतम, जमदग्नि, विश्वामित्र व अरुन्धतीनापं सप्तऋषियात तर्पण बिइगु जुगुलिं गुंपन्हियात ऋषि तर्पणी नं धाइगु याई । थुगु दिन यलःया कुम्भेश्वर, रसुवाया गोसाइँकुण्ड, नुवाकोटया देवीघाटनापंया धार्मिक क्षेत्रय् तधंगु मेला जुई । तर, थ्वः वर्ष कोरोनाया हुनिं दक्वः मन्दिर बन्द जुगुलिं व संक्रमण फैलेजुयाच्वंगु हुनिं छेँ हे च्वना हनेत सरकारं इनाप यागु दु ।
अथेहे, तराई क्षेत्रय् तता केहेंपिसं थः दाजुकिजाया नाडीइ दीर्घायु तथा सुस्वास्थ्यया कामना यासें राखी चिइगु चलन दु । तर लिपांगु वर्षय् पहाडी क्षेत्रय् नं राखी चिइगु यागु दु । थुखे, नेवाः समुदायं धासाः थुगु नखःयात गुन्हु पुन्हीया रुपय् हनिगु याई । थौंया दिन माय्, मुस्या, केगु, मुः, चना, सिमी, भुति नापं गुगु प्रकारया गेडागुडी ल्वाकछ्याना दयेकातगु क्वाँटी नयेगु चलन दु ।