जम्मू–कश्मीर व लद्दाखयात दुथ्याका पाकिस्तानं जारी यात न्हुगु राजनीतिक नक्सा

maitrinews

इस्लामावाद । पाकिस्तानं जम्मू कश्मीर, लद्दाख व जूनागढयात दुथ्याका न्हुगु राजनीतिक नक्सा जारी यागु दु । पाकिस्तानी मन्त्रिपरिषद् मुज्यां न्हुगु राजनीतिक नक्सा जारी यायेत स्वीकृति प्रदान यागु प्रधानमन्त्री इमरान खानं धयादिगु दु ।
पाकिस्तानया दक्वः विपक्षी पार्टी व पाकिस्तान प्रशासित कश्मीरया नेतातयेसं थ्वः निर्णयया लसकुस यागु दु । न्हुगु नक्सा जारी जुगु जानकारी ब्युसें प्रधानमन्त्री खानं धयादिल , ‘पाकिस्तानया न्हुगु राजनैतिक नक्सां पाकिस्तानी नागरिकया खुसीयात प्रतिनिधित्व याई । थुकिं पाकिस्तान व कश्मीरी नागरिकया सैद्धान्तिक विचारधारायात समर्थन याई ।’
पाकिस्तानी प्रधानमन्त्री खानं थ्वः नक्सां भारतं गत अगस्ट ५ य् जारी यागु न्हुगु नक्सायात न खारेज यायेगु दाबी यागु दु । ‘भारतं लिपांगु दँया अगस्ट ५ य् कश्मीरय् गुगु गैरकानुनी पलाः न्ह्याकुगु खः, उकिंयात थ्वः राजनीतिक नक्सां खारेज यानाब्युगु दु ।’ खानया कथं आः पाकिस्तानया दक्वः स्कुल, कलेज व कार्यालयतयेके मंगलबाः जारी यागु हे नक्सा प्रचलनय् वई ।
पाकिस्तानं नक्सा जारी यागु बुखँ प्रकाशित व प्रसारित जुईधुंका भारतं प्रतिक्रिया ब्युगु दु । भारतं पाकिस्तानपाखें जारी न्हुगु नक्साया छुं नं कानुनी वैधता व अन्तर्राष्ट्रिय विश्वसनीयता मदुगु प्रतिक्रिया ब्युगु दु ।