विदेशय् टिकट कायेमफुपिं अलपत्र नेपामिया निःशुल्क उद्धार याइगु

येँ । सरकारं कोरोना महामारीया हुनिं विदेशय् समस्याय् लापिं व छेँ लिहाावयेत टिकट कायेमफुपिं नेपामिया निःशुल्क उद्धार प्रक्रिया न्ह्याकुगु दु । वैदेशिक रोजगार बोर्डया सचिवालयं निःशुल्क उद्धार निर्देशिका कथं श्रम स्वीकृति कया विदेश वना अलपत्र जुपिं नागरिकया उद्धारया लागिं वैदेशिक रोजगार कल्याणकारी कोषया ७५ करोड रकम छुट्टेयागु दु ।
बोर्डया सूचना अधिकारी दीनवन्धु सुवेदीं निर्देशिका कथं बजेट छुट्टेयागु व परराष्ट्र मन्त्रालयपाखें दूतावासं छ्वइगु विवरणया आधार बोर्डं कोषया रकम दूतावासय् निकासा याइगु जानकारी बियादिल । विदेशय् च्वंगु नेपाली दूतावासं कोरोनाया हुनिं समस्याय् लापिं नेपाली श्रमिकयात यथार्थ विवरणनापं आवेदन कायेगु सुरु यागु व मेंगु वाःनिसें रकम माग वइग न वय्कलं जानकारी बियादिल । वैदेशिक रोजगार कल्याणकारी कोषया रकमपाखें नेपाली श्रमिक स्वदेश लितहयेत सरकारं जारी यागु निर्देशिकाया मापदण्डदुने च्वपिं श्रमिकयात आवेदन बिइत दूतावासं इनाप यागु दु ।
कोरोना महामारीया हुनिं विदेशय् रोजगारी गुमेयापिं व छेँ लिहाँवयेत टिकट कायेमफुगु अवस्थाय् दुपिं वैदेशिक रोजगार कल्याणकारी कोषया रकमपाखें उद्धार यायेगु निर्णय कथं सरकारं तोकेयागु मापदण्डय् लापिं श्रमिकया उद्धारया लागिं दूतावासं सूचँ जारी यागु दु ।
मलेसिया व ओमानय् च्वंगु नेपाली दूतावासं विदेशं थःगु हे खर्चय् स्वदेश लिहाँवये मफुगु अवस्थाया श्रमिकया तथ्याङ्क सङ्कलन सुरु यागु दु । उगु दूतावासं रोजगारी गुमेयाना छेँ लिहाँवयेत टिकट कायेमफुपिं श्रमिकतयेत आवेदन बिइत इनाप यागु दु ।
दूतावासया कथं तोकेयागु निवेदन ढाँचा कथं थःगु विवरण भरेयाना दूतावासय् उपस्थित जुया वा इमेल वा हटलाइन वा ह्वाट्स एपपाखें निवेदन पेस याये फइगु न व्यवस्था यागु दु । निवेदकयात निवेदन बिइगु इलय् राहदानी व रोजगारी करार पौंया प्रतिलिपिनापं पेस यायेत समेत दूतावासं इनाप यागु दु ।