स्वनिगलय् हाकनं जोर बिजोर लागू

येँ । सरकारं स्वनिगलय् हाकनं सञ्चालन जुइगु निजी तथा सार्वजनिक सवारी साधनय् जोर बिजोर प्रणाली लागू यागु दु । सरकारं बन्दाबन्दीया स्वरुप हिलाः आर्थिक गतिविधि अप्वकेगु कुतः याना नं लिपांगु ई कोरोना सङ्क्रमण जुसेलिं आवागमनय् कडाइ यासें सामूहिक भेला, भोय्, सेमिनारय् कडाइ यागु खः ।
गृह मन्त्रालयपाखें जारी विज्ञप्ति कथं थौंनिसें लागू जुइगु याना स्वनिगः नापं निसःस्वयाँ अप्वः कोभिड–१९ सङ्क्रमित लुयावगु जिल्लातयेके समेत जोर बिजोर प्रणाली लागू यागु दु । सरकारं बिहीबाःनिसें हे लागू जुइगु याना स्वनिगलय् दुहाँवइगु अत्यावश्यक ढुवानीबाहेक मेंगु दक्वः यात्रुवाहक सवारी साधनयात बहनि ७ बजेनिसें सुथय् ७ बजेतक्क आवागमन निषेध यागु खः ।
गृहं उगु निर्णययात कडाइ याना लागू यायेत दक्वः जिल्ला प्रशासन कार्यालय तथा सुरक्षा निकाययात निर्देशन ब्युगु दु । अथेहे, निसःस्वयाँ अप्वः सङ्क्रमित लुयावगु जिल्लाय् समेत बहनि ९ बजेनिसें सुथय् ५ बजेतक्क आवागमन बन्द याइगु जुगु दु । अथेहे, कोभिड–१९ या सङ्क्रमण जोखिम विश्लेषण याना जोखिम अप्वः जुगु क्षेत्र व स्थानयात जिल्ला कोभिड सङ्कट व्यवस्थापन केन्द्रं ९डिसीसीएमसी० निर्णय याना तुरुन्त बन्द यायेत व कोरोना परीक्षणया थप व्यवस्था यायेत समेत गृहं निर्देशन ब्युगु दु ।
सरकारं आवागमन अनुमति ब्युपिं व्यक्तिबाहेक अन्तर्राष्ट्रिय सीमा नाकाय् जुइगु आवतजावतयात निषेध यायेगु निर्णय यागु दु । अथेहे, होटल, रेष्टुरेन्टय् जुइगु सामूहिक भोय्, पार्टी, सेमिनार वा मेंमेगु सामूहिक भेलायात नं निषेध यागु दु । गृहं जनस्वास्थ्य मापदण्ड तथा गृह मन्त्रालयपाखें जारी सुरक्षा मापदण्डयात कडाइ याना छ्यलेत निर्देशन ब्युगु दु । मास्क मतइपिं वा जनस्वास्थ्य मापदण्डया उल्लङ्घन याइपिं व्यक्तियात जरिवाना यायेगु समेत धागु दु ।